རྣམ་རྒྱལ་གྱིས་བསྒྱུར།
མི་ནི་སྐྱེས་པ་ནས།།
གཤིས་ལ་སྙིང་རྗེ་ལྡན།།
གཤིས་རྒྱུད་ཉེ་ནའང་།།
གོམས་པས་རིང་བར་གྱུར།།
གལ་ཏེ་མ་སློབ་ན།།
གཤིས་ཀྱང་འགྱུར་བར་གྱུར།།
སློབ་སྦྱོང་བྱེད་པའི་ཐབས།།
བློ་རྩེ་སྒྲིམ་པ་གཙོ།།
སྔ་དུས་མིང་ཙིའི་མས①།།
ཁྱིམ་གཞི་ཐེངས་གསུམ་བདམས།།
བུ་ཡིས་མ་སློབ་ཚེ།།
ཐག་རྐན་བཅད་པར②བྱས།།
ཡན་ཧྲན་ཏུའུ་ཡུ་ཅུན③།།
སློབ་གསོའི་ཐབས་ལ་མཁས།།
བུ་ལྔ་སྐྱོང་བ་ལ།།
ཐམས་ཅད་མིང་གྲགས་ལྡན།།
བུ་རྒྱུད་མ་སྐྱོང་ན།།
ཕ་ཡི་ཉེས་པ་རེད།།
ཁྲིད་ཀྱང་མ་གཟབ་ན།།
བཤེས་ཀྱི་སྒྱིད་ལུག་གོ།
བུ་ཡིས་མ་བསླབ་ན།།
ཧ་ཅང་མི་འཚམ་ལ།།
བྱིས་དུས་མ་སྦྱང་བ།།
རྒན་དུས་ཇི་ལྟར་བྱ།།
གཡང་ཏུ་བཞེངས་མིད་ན།།
ཡོལ་གོར་ཇི་ལྟར་གྱུར།།
མི་ཡིས་མ་སློབ་ཚེ།།
གནས་ལུགས་རྟོགས་མི་འགྱུར།།
སློབ་མར་གྱུར་པ་ན།།
གཞོན་པའི་དུས་ནས་བཟུང་།།
བཤེས་གཉེན་ལ་བརྟེན་ཅིང་།།
མི་ཆོས་གུས་ལུགས་སྦྱང་།།
ཧོང་ཞང④ལོ་དགུ་ཐོག།
ཉལ་ཐུལ་བསྲོ་བར་ནུས།།
ཕ་མར་སྲི་ཞུའི་ཚུལ།།
ཀུན་གྱིས་ལད་མོ་བྱ།།
སྒྱུར་པ་པོའི་མཆན།
① མིང་ཙེའི་མ།རུའུ་ལུགས་པ་ཆེན་པོ་མིང་ཙེའི་མ་ནི་བུ་སྐྱོང་བར་ཤིན་ཏུ་མཁས་ལ།མིང་ཙི་སྐུ་ཆུང་བའི་སྐབས་ཕ་ཚེ་ལས་འདས་པས།
ཁྱིམ་ཚང་ཧ་ཅང་དབུལ་བོར་གྱུར།གཞན་གྱི་ལད་མོ་བྱེད་པར་དགའ་བས་ཁྱིམ་གྱི་འཁྲིས་སུ་དུར་ཁྲོད་ཅིག་ཡོད་པར་མིང་ཙིས་མྱ་ངན་གྱི་གོས་གོན་པ་དང་ངུ་མོ་བྱེད་པར་སློབ་པས་མ་ཡིས་དེར་བསྡད་ན་མི་རུང་བར་དགོངས་ནས་གནས་སྤོས་ཏེ་ཚོང་རའི་མཐའ་རུ་བསྡད།མིང་ཙིས་ཁྱིམ་མཚེས་ཀྱི་ཕག་པ་བཤས་ཏེ་ཚོང་བྱས་པ་མཐོང་འཕྲལ་དེའི་ལད་མོ་བྱས་ཏེ་རིན་གོང་གཏམ་པར་སློབ།མིང་ཙིའི་མ་ཡིས་དེའང་མི་རུང་བར་དགོངས་ཏེ་སློབ་གྲྭ་ཞིག་གི་མཐའ་རུ་གནས་སྤོ་བྱས་པས་མིང་ཙིས་ད་གཟོད་དཔེ་ཆ་འདོན་པར་ཧུར་ཐག་བྱས་སོ།།
②ཐག་རྐན་བཅད་པ།མིང་ཙི་མ་སྨད་ཀྱི་འཚོ་བ་གཙོ་བོ་གཞན་ལ་ཐག་ལས་ཁོ་ན་བརྟེན་འདུགཉིན་ཞིག་ལ།མིང་ཙིས་སློབ་སྦྱོང་ལེགས་པོ་མི་བྱེད་པ་མ་ཡིས་མཐོང་ནས་སྐྱོ་བ་དང་བཅས་ཐག་རྐན་བཅད་དོ།།དེས་མིང་ཙེའི་སེམས་སུ་ཧ་ཅང་གནོད་པར་གྱུར་པས་རྗེས་སུ་སློབ་ལ་བརྩོན་འགྲུས་ཆུ་བོའི་རྒྱུན་བཞིན་བསྟེན་པས་མཁས་པའི་ཡང་རྩེར་སོན་ནོ།།
③ཡན་ཧྲན་ཏུའུ་ཡུ་ཅུན།ཡན་ཧྲན་རི་བོའི་མིང་ལ་ཏུའུ་ཡུ་ཅུན་ཞེས་པ་ནི་རྒྱལ་རབས་ལྔ་དུས་ཀྱི་ཅིན་གོའི་མི་རེད།དེ་ལ་བུ་ལྔ་ཡོད་པ་ཐམས་ཅད་མིང་གྲགས་ཅན་དུ་གྱུར།
④ ཧོང་ཞང་།ཧན་རྒྱལ་རབས་ཤར་མའི་ཅིང་ཞ་ཞེས་པའི་མི་རེད།དེ་ལ་སྲི་ཞུ་ཅན་ཆེན་པོ་ཞེས་སྙན་པའི་གྲགས་པ་འབར་འདུག།
མི་རིགས་དཔེ་སྐྲུན་ཁང་གི་བོད་འགྱུར་ཀྲུང་གོའི་སྲོལ་རྒྱུན་རིག་གནས་ཀྱི་གསུང་རབ་དཔེ་ཚོགས་ཀྱི་བྱིས་པའི་གཙུག་ལག་འབྲུ་གསུམ་པ་ཞེས་པ་ལས་བཤུས།