ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ནགས་ལས་དང་རྩྭ་ཐང་ཅུའུ་ཡིས་ཟླ8ཀྱི་དུས་ཚོད་སྤྱད་ནས་རྒྱལ་ཡོངས་སུ་ནགས་ཚལ་དང་རྩྭ་ཐང་དུ“ལྗང་མདོག་སྲུང་སྐྱོང2019”ཞེས་པའི་མཉམ་འབྲེལ་ཁྲིམས་འཛིན་གྱི་ཆེད་དོན་བྱ་སྤྱོད་སྤེལ་རྒྱུ་ཡིན་ཞིང་། ཆེད་དོན་བྱ་སྤྱོད་ཀྱིས2013ལོའི་ཚུན་གྱི་ཁྲིམས་འགལ་ངང་ནགས་ས་དང་རྩྭ་ཐང་གསར་སྦོལ་བྱས་པ་དང་། ཁྲིམས་འགལ་ངང་ནགས་ས་དང་རྩྭ་ཐང་བཟུང་སྤྱོད་བྱས་པ། ཁྲིམས་འགལ་ངང་རྩྭ་ཐང་གི་རི་སྐྱེས་རྩི་ཤིང་སྔོག་འཐུ་དང་ཤིང་ནགས་གང་བྱུང་དུ་བཅད་པ་སོགས་ཁྲིམས་འགལ་ངང་ནགས་ཚལ་དང་རྩྭ་ཐང་གི་ཐོན་ཁུངས་ལ་གཏོར་བཤིག་བཏང་བའི་བྱེད་སྤྱོད་ལ་རྡུང་རྡེག་ཚ་ནན་གཏོང་རྒྱུ་ཡིན་ཞིང་། ལྷག་པར་དུ་ཁྲིམས་འགལ་ངང་ནགས་ས་དང་རྩྭ་ཐང་བཟུང་སྤྱོད་བྱས་ནས་སྤྲོ་ཁང་དང་། ཀོར་ཧྥུ་སྤོ་ལོའི་ཐང་། རྒྱས་སྤྲོས་ཆེ་བའི་དུར་ས་བཅས་བསྐྲུན་པ། གཏེར་ཁ་གསར་སྤེལ་བྱས་པ་སོགས་ནགས་ཚལ་དང་རྩྭ་ཐང་གི་ཐོན་ཁུངས་ལ་གཏོར་བཤིག་ཚབས་ཆེན་བཟོས་པའི་ཁྲིམས་འགལ་བྱེད་སྤྱོད་ལ་རྡུང་རྡེག་མཐའ་གཅིག་ཏུ་གཏོང་རྒྱུ་ཡིན་པ་རེད།
ཤེས་རྟོགས་བྱུང་བར་གཞིགས་ན། 2013ལོ་ནས2018ལོའི་བར་རྒྱལ་ཡོངས་སུ་ནགས་ལས་ཀྱི་སྲིད་འཛིན་གྱོད་གཞི་བསྡོམས་ཁྲི125ལྷག་ཙམ་ཤེས་རྟོགས་བྱུང་ནས་གྱོད་གཞི་ཁྲི123ཞིབ་བཤེར་ཐག་གཅོད་བྱས་པ་དང་། རྩྭ་ཐང་ལ་གཏོར་བཤིག་བཏང་བའི་གྱོད་གཞི་ཁྲི9ལྷག་ཙམ་ཞིབ་བཤེར་རྩད་གཅོད་བྱས་པ་བརྒྱུད་ནགས་ཚལ་དང་རྩྭ་ཐང་གི་ཐོན་ཁོངས་གཏོར་བཤིག་བཏང་བའི་ཁྲིམས་འགལ་ཉེས་གསོག་བྱེད་སྤྱོད་ནུས་ལྡན་ངང་བཀག་འགོག་ཐུབ་ཡོད་མོད། འོན་ཀྱང་རྒྱལ་ཡོངས་ཀྱི་ནགས་ཚལ་ལ་ལྟ་སྐུལ་ཞིབ་བཤེར་དང་རྩྭ་ཐང་ལ་ཁྲིམས་འཛིན་ལག་བསྟར་ལྟ་སྐུལ་བྱས་པ་བརྒྱུད་ས་ཁུལ་ཁག་གཅིག་ཏུ་ལས་གྲྭ་འཛུགས་སྐྲུན་བྱེད་སྐབས་ཁྲིམས་འགལ་ངང་ནགས་ས་དང་རྩྭ་ཐང་བཟུང་སྤྱོད་དང་། ནགས་ཚལ་དང་རྩྭ་ཐང་ལ་གཏོར་བཤིག་བཏང་ནས་གསར་སྦོལ་བྱེད་པ། ཁྲིམས་འགལ་ངང་རྩྭ་ཐང་གི་རི་སྐྱེས་རྩི་ཤིང་སྔོག་འཐུ་དང་ཤིང་ནགས་གང་བྱུང་དུ་གཅོད་པ་སོགས་ཁྲིམས་འགལ་ངང་ནགས་ཚལ་དང་རྩྭ་ཐང་གི་ཐོན་ཁུངས་ལ་གཏོར་བཤིག་གཏོང་བའི་གནད་དོན་སྔར་བཞིན་ཚབས་ཧ་ཅང་ལྕི་པོ་ཡོད། 2018ལོར་ནགས་ཚལ་ལྟ་སྐུལ་ཞིབ་བཤེར་བྱེད་རིང་རྒྱལ་ཁབ་ནགས་ལས་དང་རྩྭ་ཐང་ཅུས་ཀྱིས་ལག་རྩལ་གསར་པ་བེད་སྤྱོད་དང་རྒྱལ་ཡོངས་སུ་ཁྱབ་པའི་ཞིབ་བཤེར་བྱས་པ་བརྒྱུད་ལས་གྲྭ་འཛུགས་སྐྲུན་དང་། བྱེ་རྡོ་དང་གཏེར་ཁ་སྔོག་འདོན། སྒྲིག་འགལ་ངང་ས་ཞིང་བཅོས་སྒྲིག་རྣམ་གྲངས་སོགས་ཁྲིམས་འགལ་གྱི་ཁོངས་སྣེ་ཁྲི16ལྷག་ཙམ་ཤེས་རྟོགས་བྱུང་ཡོད་པ་རེད། །